ફતેપુરા: મુસ્લિમ સમાજના કબ્રસ્તાન પાસે ગંદકીનું સામ્રાજ્ય, તંત્રની ઘોર બેદરકારી કે કોઈ મોટું ષડયંત્ર?

ફતેપુરા: મુસ્લિમ સમાજના કબ્રસ્તાન પાસે ગંદકીનું સામ્રાજ્ય, તંત્રની ઘોર બેદરકારી કે કોઈ મોટું ષડયંત્ર?
ફતેપુરા ગ્રામ પંચાયતની હદમાં આવેલા મુસ્લિમ સમાજના કબ્રસ્તાન પાસે હાલ સ્થિતિ અત્યંત દયનીય બની છે. કબ્રસ્તાનની બિલકુલ સામે જ પંચાયત દ્વારા 'ડમ્પિંગ યાર્ડ' જેવી સ્થિતિ ઉભી કરી દેવામાં આવી છે, જેના કારણે સ્થાનિકો અને મુસાફરોમાં ભારે રોષ જોવા મળી રહ્યો છે.
મુખ્ય સમસ્યાઓ અને વેધક સવાલો:

દુર્ગંધ અને રોગચાળો: ડમ્પિંગ યાર્ડમાંથી આવતી અસહ્ય દુર્ગંધને કારણે અહીંથી પસાર થવું પણ મુશ્કેલ બન્યું છે. આ ગંદકીને કારણે આસપાસના વિસ્તારમાં રોગચાળો ફેલાવાની ભીતિ સેવાઈ રહી છે.
તળાવ પચાવી પાડવાનું ષડયંત્ર? સ્થાનિકોનો આક્ષેપ છે કે જ્યાં ગંદકી નાખવામાં આવે છે તેની મુખ્ય બાજુએ તળાવ આવેલું છે. આ રીતે ગંદકી ખડકીને ધીમે-ધીમે તળાવની જમીન દબાવવાનું અથવા પચાવી પાડવાનું કોઈ મોટું ષડયંત્ર તો નથી ને? તેવા સવાલો ઉઠી રહ્યા છે.
નિષ્ફળ રજૂઆતો: મુસ્લિમ સમાજ દ્વારા આ બાબતે અનેકવાર પંચાયત અને તંત્રને લેખિત તથા મૌખિક રજૂઆતો કરવામાં આવી છે, તેમ છતાં તંત્ર 'આંખ આડા કાન' કરી રહ્યું હોય તેમ લાગે છે.
ચૂંટાયેલા પ્રતિનિધિઓની નિષ્ક્રિયતા: સૌથી વધુ આક્રોશ એ વાતનો છે કે મુસ્લિમ સમાજના પોતાના સભ્યો પણ પંચાયતમાં ચૂંટાયેલા છે. આમ છતાં, તેઓ આ પ્રશ્નનો ઉકેલ લાવવામાં સંપૂર્ણપણે નિષ્ફળ રહ્યા છે. શું આ સભ્યોની મજબૂરી છે કે પછી તેમની ઉદાસીનતા?
સમાજમાં રોષની લાગણી

પવિત્ર ગણાતા કબ્રસ્તાન જેવા સ્થળની સામે જ આ પ્રકારે કચરાના ઢગલા કરવા તે ધાર્મિક લાગણી દુભાવવા સમાન છે. લોકો પૂછી રહ્યા છે કે:
શું તંત્ર જાણી જોઈને આ સમસ્યાનો નિકાલ નથી કરતું?
શું તળાવની કિંમતી જમીન પર કોઈની ભૂખ નજર છે?
ચૂંટાયેલા પ્રતિનિધિઓ કેમ મૌન સેવી રહ્યા છે?

રિપોર્ટર -  યાસીર ગુડાલા ફતેપુરા