કલોલ તાલુકાના નારદીપુર ખાતે શ્રાવણ પૂર્ણાહુતિ નિમિત્તે દાદા ફાર્મ એન્ડ રિસોર્ટ ખાતે ભોલેનાથ દાદાના હવનનું આયોજન
વર્ષ 1995થી ચાલી આવતી ધાર્મિક પરંપરા અંતર્ગત હવન અને ભોજન પ્રસાદનું આયોજન રાજકીય આગેવાનો સહિત મોટી સંખ્યામાં શિવભક્તો ઉપસ્થિત રહ્યા
ગાંધીનગર જિલ્લાના કલોલ તાલુકાના નારદીપુર ગામ ખાતે આવેલ દાદા ફાર્મ એન્ડ રિસોર્ટ ખાતે પવિત્ર શ્રાવણ માસની પૂર્ણાહુતિ નિમિત્તે ભોલેનાથ દાદાના હવન સહિતના ધાર્મિક કાર્યક્રમનું ભક્તિભાવપૂર્ણ વાતાવરણમાં આયોજન કરવામાં આવ્યું હતું. ભાદરવા સુદ-1ના પાવન દિવસે યોજાયેલા આ ધાર્મિક પ્રસંગમાં મોટી સંખ્યામાં શિવભક્તો, મિત્રો, સ્વજનો તેમજ ગાંધીનગર જિલ્લાના રાજકીય અને સામાજિક ક્ષેત્રના આગેવાનો ઉપસ્થિત રહ્યા હતા.
દાદા ફાર્મ એન્ડ રિસોર્ટ ખાતે વર્ષ 1995થી અવિરત ચાલી આવતી આ ધાર્મિક પરંપરા અંતર્ગત દર વર્ષે શ્રાવણ માસની પૂર્ણાહુતિ નિમિત્તે ભોલેનાથ દાદાના હવનનું આયોજન કરવામાં આવે છે. આ સાથે ઉપસ્થિત ભક્તો માટે ભોજન પ્રસાદની પણ વ્યવસ્થા કરવામાં આવે છે. વર્ષોથી ચાલી આવતી આ પરંપરા શ્રદ્ધા અને આસ્થાનું કેન્દ્ર બની રહી છે.
આ વર્ષે પણ ધાર્મિક વિધિ મુજબ ભોલેનાથ દાદાના હવનનું આયોજન કરવામાં આવ્યું હતું. વૈદિક મંત્રોચ્ચાર અને ધાર્મિક વિધિ સાથે હવન કરવામાં આવતા સમગ્ર દાદા ફાર્મ એન્ડ રિસોર્ટ પરિસર ભક્તિમય બની ગયું હતું. ઉપસ્થિત શ્રદ્ધાળુઓએ હવનમાં આહુતિ આપી ભોલેનાથ દાદાના દર્શન કરી ધન્યતા અનુભવી હતી.
આ સમગ્ર ધાર્મિક કાર્યક્રમનું આયોજન ગાંધીનગર જિલ્લા પંચાયતના પ્રમુખ રાજેશકુમાર સેંધાભાઈ પટેલ તથા પટેલ હિતેન્દ્રકુમાર સેંધાભાઈ (દાદા ટ્રાવેલ્સ) દ્વારા કરવામાં આવ્યું હતું. આયોજકો દ્વારા ઉપસ્થિત તમામ મહેમાનો અને શિવભક્તો માટે દર્શન તેમજ ભોજન પ્રસાદની સુંદર વ્યવસ્થા કરવામાં આવી હતી.
ધાર્મિક કાર્યક્રમમાં ગાંધીનગર જિલ્લાના વિવિધ ક્ષેત્રના આગેવાનો, મિત્રો અને સ્વજનો મોટી સંખ્યામાં ઉપસ્થિત રહ્યા હતા. સૌએ ભોલેનાથ દાદાના દર્શન કરી હવનનો લાભ લીધો હતો. ત્યારબાદ ઉપસ્થિત સૌ ભક્તો અને મહેમાનોએ ભોજન પ્રસાદ ગ્રહણ કર્યો હતો.
શ્રાવણ માસ ભગવાન શિવની આરાધના માટે પવિત્ર માનવામાં આવે છે ત્યારે શ્રાવણ પૂર્ણાહુતિના પાવન અવસરે યોજાયેલા આ ધાર્મિક કાર્યક્રમમાં ભક્તિ, શ્રદ્ધા અને આસ્થાનો અનોખો સંગમ જોવા મળ્યો હતો. વર્ષોથી ચાલી આવતી ધાર્મિક પરંપરાને જાળવી રાખીને યોજાતા આવા કાર્યક્રમોથી ધાર્મિક ભાવના સાથે સમાજમાં એકતા અને ભાઈચારાની ભાવના પણ મજબૂત બને છે.
આ પ્રસંગે ઉપસ્થિત શિવભક્તોએ ભોલેનાથ દાદાના આશીર્વાદ મેળવી પરિવાર અને સમાજની સુખ-શાંતિ, સમૃદ્ધિ અને આરોગ્ય માટે પ્રાર્થના કરી હતી. સમગ્ર કાર્યક્રમ દરમિયાન 'હર હર મહાદેવ'ના જયઘોષથી દાદા ફાર્મ એન્ડ રિસોર્ટનું વાતાવરણ ગુંજી ઉઠ્યું હતું.
લક્ષ ન્યુઝ – કલોલ
