કલોલ : કલોલ શહેરમાં વધતી ટ્રાફિક સમસ્યા અને જાહેર માર્ગો પર થતા કથિત દબાણોના પ્રશ્ને હવે સ્થાનિકોમાં નારાજગી જોવા મળી રહી છે. કલોલ શહેરના વોર્ડ નંબર-૬માં આવેલા રામજી મંદિરથી ટાવરચોક સુધીના માર્ગને દબાણમુક્ત કરી ખુલ્લો કરવા સ્થાનિકો દ્વારા કલોલ નગરપાલિકા ખાતે લેખિત રજૂઆત કરવામાં આવી છે.
સ્થાનિકોની રજૂઆત મુજબ, ટાવરચોકથી પાંચ હાટડી બજાર થઈ રામજી મંદિર તરફ જતા માર્ગ પર કેટલાક દુકાનદારો દ્વારા દુકાનની બહાર લાકડાના પાટિયા, લોખંડના પલંગ, પાથરણાં તેમજ અન્ય સામાન મૂકવામાં આવતો હોવાનો આક્ષેપ કરવામાં આવ્યો છે. આ ઉપરાંત કેટલાક સ્થળોએ કથિત રીતે પતરાના પાકા શેડ ઉભા કરી જાહેર રસ્તાની જગ્યા રોકવામાં આવી હોવાની ફરિયાદ પણ કરવામાં આવી છે.
જાહેર રસ્તો સાંકડો બનતા અવરજવરમાં મુશ્કેલી
સ્થાનિકોના જણાવ્યા પ્રમાણે, જાહેર રસ્તા પર સામાન તથા અન્ય માળખાં મૂકવામાં આવતા રસ્તાની પહોળાઈ ઘટી રહી છે. પરિણામે રાહદારીઓ, દ્વિચક્રી વાહનચાલકો તેમજ અન્ય વાહનચાલકોને પસાર થવામાં મુશ્કેલી પડી રહી છે. ખાસ કરીને બજાર વિસ્તારમાં લોકોની અવરજવર વધતી હોય ત્યારે ટ્રાફિકની સમસ્યા વધુ ગંભીર બનતી હોવાની રજૂઆત કરવામાં આવી છે.
મંદિરોના દર્શનાર્થીઓને પણ મુશ્કેલી
આ માર્ગ પર વૈષ્ણવ મંદિર તેમજ રામજી મંદિર આવેલા હોવાથી મોટી સંખ્યામાં શ્રદ્ધાળુઓ અને દર્શનાર્થીઓની અવરજવર રહે છે. રસ્તા પર દબાણના કારણે મંદિર આવતા-જતા શ્રદ્ધાળુઓને પણ મુશ્કેલીનો સામનો કરવો પડતો હોવાની રજૂઆતમાં જણાવાયું છે.
સ્થાનિકોએ માંગ કરી છે કે મંદિર વિસ્તાર અને બજાર વિસ્તારને ધ્યાનમાં રાખી જાહેર માર્ગ પરના દબાણો અંગે તંત્ર દ્વારા સ્થળ તપાસ કરવામાં આવે અને નિયમ વિરુદ્ધના દબાણો દૂર કરવામાં આવે.
આકસ્મિક સમયે ઈમરજન્સી સેવાઓ પહોંચે તે જરૂરી
રામજી મંદિર આસપાસ રહેણાંક મકાનો પણ આવેલા છે. સ્થાનિકોએ રજૂઆતમાં મહત્વનો મુદ્દો ઉઠાવતા જણાવ્યું છે કે જો વિસ્તારમાં આગ, તબીબી કટોકટી કે અન્ય કોઈ આકસ્મિક બનાવ બને તો 108 એમ્બ્યુલન્સ, પોલીસ વાહન અથવા ફાયરબ્રિગેડ જેવા ઈમરજન્સી વાહનોને ઘટનાસ્થળ સુધી પહોંચવામાં મુશ્કેલી ઊભી થઈ શકે છે.
જાહેર રસ્તો ખુલ્લો અને અવરોધમુક્ત રહે તે માત્ર ટ્રાફિક વ્યવસ્થા માટે જ નહીં પરંતુ ઈમરજન્સી સેવાઓની ઝડપી પહોંચ માટે પણ જરૂરી હોવાનું સ્થાનિકો દ્વારા જણાવાયું છે.
ગામેચાના વાસ બહાર ગંદકીનો પણ પ્રશ્ન
રજૂઆતમાં ગામેચાના વાસની બહાર આવેલા બાલકૃષ્ણ મંદિર નજીકની સ્વચ્છતા અંગે પણ ફરિયાદ કરવામાં આવી છે. સ્થાનિકોના જણાવ્યા મુજબ, વિસ્તારમાં કચરો તેમજ કથિત રીતે માંસાહારી ખોરાક ફેંકવામાં આવતો હોવાથી ગંદકી અને દુર્ગંધની સમસ્યા સર્જાય છે.
આ સ્થિતિને કારણે સ્થાનિક રહેવાસીઓ તેમજ ગામેચાના વાસમાં અવરજવર કરતા લોકોને મુશ્કેલી પડી રહી હોવાનો આક્ષેપ કરવામાં આવ્યો છે. સ્થાનિકોએ આ વિસ્તારમાં નિયમિત સફાઈ કરાવવા તેમજ જાહેરમાં કચરો ફેંકનારાઓ સામે નિયમ મુજબ કાર્યવાહી કરવાની માંગ કરી છે.
નગરપાલિકા સમક્ષ તાત્કાલિક કાર્યવાહી કરવાની માંગ
સ્થાનિકો દ્વારા કલોલ નગરપાલિકાને કરવામાં આવેલી લેખિત રજૂઆતમાં ટાવરચોકથી રામજી મંદિર સુધીના માર્ગનું સ્થળ નિરીક્ષણ કરી દબાણોની તપાસ કરવા, નિયમ વિરુદ્ધના દબાણો દૂર કરવા, માર્ગ ખુલ્લો કરવા તથા ગંદકીની સમસ્યાનો કાયમી ઉકેલ લાવવા માંગ કરવામાં આવી છે.
સ્થાનિકોનું કહેવું છે કે જાહેર રસ્તાઓનો ઉપયોગ લોકોની અવરજવર માટે સરળ અને સુરક્ષિત રહે તે માટે તંત્ર દ્વારા નિયમિત દબાણ ચકાસણી અને કાર્યવાહી જરૂરી છે.રજૂઆતકર્તાઓએ વધુમાં જણાવ્યું છે કે જો સ્થાનિક સ્તરે આ પ્રશ્નનો યોગ્ય નિકાલ નહીં આવે તો તેઓ કલેક્ટર કચેરી તેમજ કલોલ પોલીસ તંત્ર સમક્ષ રૂબરૂ રજૂઆત કરશે.
હવે સમગ્ર મામલે કલોલ નગરપાલિકા અને સંબંધિત તંત્ર દ્વારા સ્થળ તપાસ કરવામાં આવે છે કે નહીં અને જો દબાણો નિયમ વિરુદ્ધ હોવાનું જણાય તો તેને દૂર કરવા માટે ક્યારે કાર્યવાહી હાથ ધરવામાં આવે છે, તેના પર સ્થાનિકોની નજર રહેશે.
લક્ષ ન્યુઝ | સંજય નાયક
