કલોલ માં ટ્રાફિક નિયમોનું ઉલ્લંઘન કરનારાઓ સામે પોલીસની કડક કાર્યવાહી

કલોલ 

કલોલ માં ટ્રાફિક નિયમોનું ઉલ્લંઘન કરનારાઓ સામે પોલીસની કડક કાર્યવાહી

કલોલ શહેરમાં ટ્રાફિક નિયમોનું પાલન સુનિશ્ચિત કરવા માટે શહેર પોલીસ દ્વારા વિવિધ વિસ્તારોમાં વિશેષ ડ્રાઇવ હાથ ધરવામાં આવી હતી. આ અભિયાન દરમિયાન શહેરના મુખ્ય માર્ગો તથા જુદા જુદા ચેકિંગ પોઇન્ટ પર પોલીસે સઘન તપાસ હાથ ધરી હતી.
આ કામગીરી દરમિયાન ખાસ કરીને કાળા કાચ (બ્લેક ફિલ્મ) લગાવેલી કારો સામે કડક કાર્યવાહી કરવામાં આવી હતી. પોલીસે આવા વાહનોને રોકી સ્થળ પર જ દંડ વસૂલ કર્યો હતો તેમજ ગાડીઓના કાચ ઉપર લગાવવામાં આવેલી ગેરકાયદેસર બ્લેક ફિલ્મ દૂર કરવામાં આવી હતી.

પોલીસ દ્વારા માત્ર કારચાલકો જ નહીં પરંતુ ટ્રાફિક નિયમોનું ઉલ્લંઘન કરતા ટુ-વ્હીલર ચાલકો સામે પણ કાર્યવાહી કરવામાં આવી હતી. હેલ્મેટ વગર વાહન ચલાવનારાઓ તેમજ નિયમોનું પાલન ન કરતા લોકોને દંડ ફટકારવામાં આવ્યો હતો.
ઉપરાંત, નંબર પ્લેટ વગર ફરતા વાહનો સામે પણ પોલીસ સખત બની હતી. આવી કામગીરી દરમિયાન પોલીસે કુલ પાંચ જેટલા વાહનો ઝડપી પાડ્યા હતા અને તેમના ચાલકો સામે કાયદેસરની કાર્યવાહી હાથ ધરી હતી.

આ સમગ્ર ડ્રાઇવ દરમિયાન પોલીસ દ્વારા નોંધપાત્ર દંડ વસૂલવામાં આવ્યો હતો અને ટ્રાફિક નિયમોનો ભંગ કરનારાઓને કડક સંદેશ આપવામાં આવ્યો હતો કે ભવિષ્યમાં નિયમોનું પાલન ન કરનારાઓ સામે વધુ કડક પગલાં લેવામાં આવશે.

કલોલ શહેર પોલીસની આ કામગીરીને કારણે શહેરમાં ટ્રાફિક શિસ્ત જળવાઈ રહે તેવો સકારાત્મક સંદેશ વ્યાપ્યો છે.