કલોલના ધારાસભ્ય બકાજી ઠાકોરે દિવાળીના પર્વે નવીન રેન બસેરામાં નિરાધાર અને જરૂરિયાતમંદ લોકો સાથે ખુશીઓ વહેંચી
મીઠાઈ અને ચવાણાનું વિતરણ કરી દિવાળીની શુભેચ્છાઓ પાઠવી; માનવતા અને સેવાભાવનું સુંદર ઉદાહરણ પૂરું પાડ્યું.
કલોલ : દિવાળી એટલે પ્રકાશનો પર્વ, ખુશીઓનો તહેવાર અને એકબીજાના જીવનમાં આનંદનો ઉજાસ પાથરવાનો અવસર. તહેવારની સાચી ખુશી ત્યારે સાર્થક બને છે, જ્યારે સમાજના જરૂરિયાતમંદ અને વંચિત લોકોના ચહેરા પર સ્મિત લાવવાનો પ્રયાસ કરવામાં આવે. આ જ સેવાભાવ અને માનવતાની ભાવનાને સાકાર કરવાના હેતુથી કલોલ શહેરના લોકલાડીલા ધારાસભ્યશ્રી લક્ષ્મણજી પૂજાજી ઠાકોર (બકાજી) દ્વારા દિવાળીના પાવન પર્વ નિમિત્તે એક સરાહનીય સેવાકાર્ય કરવામાં આવ્યું હતું.
કલોલ ખાતે જન સેવા ટ્રસ્ટ દ્વારા સંચાલિત નવીન રેન બસેરામાં દિવાળીના તહેવાર નિમિત્તે ધારાસભ્ય બકાજી ઠાકોરે મુલાકાત લીધી હતી. આ પ્રસંગે તેમણે રેન બસેરામાં આશ્રય લઈ રહેલા જરૂરિયાતમંદ, નિરાધાર અને વંચિત લોકો સાથે આત્મીયતાભર્યો સમય વિતાવ્યો હતો. માત્ર ઔપચારિક શુભેચ્છાઓ પૂરતી મર્યાદિત ન રહેતાં, તેમણે સૌને પ્રેમ અને લાગણીપૂર્વક મીઠાઈ તેમજ ચવાણાના પેકેટનું વિતરણ કરી દિવાળીની ખુશીઓમાં સહભાગી બનાવ્યા હતા.
આ પ્રસંગે ધારાસભ્ય બકાજી ઠાકોરે ઉપસ્થિત સૌને દિવાળી અને નૂતન વર્ષની હાર્દિક શુભકામનાઓ પાઠવી હતી. તહેવારના આ અવસરે દરેક વ્યક્તિના જીવનમાં સુખ, શાંતિ, સમૃદ્ધિ અને ખુશીઓ આવે તેવી ભાવના વ્યક્ત કરવામાં આવી હતી.
આ સેવાકીય કાર્યક્રમમાં કલોલ નગરપાલિકાના કોર્પોરેટર અને શાસક પક્ષના નેતા કુણાલભાઈ દેસાઈ, સંજયભાઈ શર્મા, અલકાબેન શુક્લા, કૈલાશબેન નાયક તેમજ યશવંતસિંહ રાઠોડ સહિતના આગેવાનો ઉપસ્થિત રહ્યા હતા. તમામ મહાનુભાવોએ રેન બસેરામાં રહેતા લોકોને મીઠાઈ અને ચવાણાનું વિતરણ કરી તેમની સાથે દિવાળીની ખુશીઓ વહેંચી હતી.
આ ઉપરાંત જન સેવા ટ્રસ્ટનાં પ્રમુખ શીતલબેન પ્રજાપતિ, મંત્રી પારુલબેન તેમજ સંસ્થાના કાર્યકરો પણ આ પ્રસંગે ઉપસ્થિત રહ્યા હતા. ટ્રસ્ટના હોદ્દેદારો અને કાર્યકરોએ આ સેવાકીય પહેલમાં સહભાગી બની કાર્યક્રમને સફળ બનાવ્યો હતો.
ઉલ્લેખનીય છે કે દિવાળી જેવા તહેવારોમાં અનેક પરિવારો પોતાના સ્વજનો સાથે આનંદ અને ઉત્સાહથી ઉજવણી કરતા હોય છે, ત્યારે સમાજના એવા લોકો કે જેઓ કોઈ કારણોસર પોતાના પરિવારથી દૂર રહી રેન બસેરામાં આશ્રય લઈ રહ્યા છે, તેમના જીવનમાં પણ તહેવારની ખુશીઓ પહોંચે તેવો આ પ્રયાસ ખરેખર પ્રશંસનીય રહ્યો હતો.
સેવા એ જ સાચો ધર્મ અને બીજાના ચહેરા પર સ્મિત લાવવું એ જ તહેવારની સાચી ઉજવણી છે. કલોલના ધારાસભ્ય અને ઉપસ્થિત આગેવાનો દ્વારા કરવામાં આવેલી આ પહેલે માનવતા, સંવેદના અને સામાજિક જવાબદારીનો સુંદર સંદેશ આપ્યો હતો.
લક્ષ ન્યુઝ - કલોલ
